इलामको चिया क्षेत्रमा काम गर्ने जनशक्ति अभाव हुँदै जाँदा इलामका कृषकले प्रविधिको प्रयोग बढाएका छन् ।
चियाका बोट काँटछाँट गर्नुपर्ने बेलामा दक्ष जनशक्ति अभाव हुँदा किसानले विकल्पमा मेसिनको प्रयोग बढाएका हुन् । ६० प्रतिशतभन्दा धेरै चिया क्षेत्र रहेको इलाम नगरपालिका १, साँखेजुङमा वडा कार्यालयले सहकारीमार्फत किसानलाई अनुदानमा चिया काट्ने मेसिन उपलब्ध गराएको वडाध्यक्ष गायत्रीराम बस्नेतले जानकारी दिए ।
त्यस्तै राष्ट्रिय चिया तथा कफी विकास बोर्डले पनि मेसिन उपलब्ध गराएको छ भने कतिपय कृषकले आफ्नै लगानीमा पनि खरिद गरेका छन् । मेसिनले काम गर्न छिटो हुने भएकाले पनि प्रयोग बढेको किसानको अनुभव छ ।
धेरै उत्पादन गर्न र बगानको आकार मिलाउन पनि चियाको कटिङ अनिवार्य छ । बोटको उमेरअनुसार विभिन्न ६ चरणमा चियाको काँटछाँट हुने गरको छ । चैतदेखि कात्तिकसम्म चिया टिपाइ हुन्छ । मंसिरयता काँटछाँटको समय हो ।
