झापाको कनकाई नगरपालिकाको वडा नम्बर ६ मा उपनिर्वाचन हुने भएको छ ।
निर्वाचन आयोगले स्थानीय तहमा रिक्त रहेका विभिन्न ३४ वटा पदमा आगामी मंसिर तेस्रो साता उपनिर्वाचन गर्न प्रस्ताव गरेको छ ।
स्थानीय तहमा रिक्त रहेका ३४ वटा पद मध्ये झापाको कनकाई नगरपालिका–६ नम्बर वडामा उपनिर्वाचन हुने भएको हो ।
कनकाई नगरपालिका–६ का वडाध्यक्ष दिर्घबहादुर थापाको २०८१ असार २ गते निधन भएको थियो ।
वडाध्यक्ष थापाको पित्तथैलीमा क्यान्सरका कारण मृत्यु भएको थियो । उनी गत २०७९ वैशाख ३० गते सम्पन्न भएको स्थानीय तहको निर्वाचनमा कनकाई नगरपालिका–६ बाट निर्वाचित वडाध्यक्ष हुन् ।
रिक्त रहेको उक्त पदमा अब आगामी मंसिरमा उपनिर्वाचन गर्ने तयारी गरिएको छ । सोमबार आयोगले प्रधानमन्त्री केपी शर्मा ओलीसँगको भेटमा उपनिर्वाचनको उक्त मिति प्रस्ताव गरेको थियो ।
देशभरबाट विभिन्न कारणले नगरपालिका प्रमुख र उपप्रमुख तथा गाउँपालिकाका अध्यक्ष र उपाध्यक्ष तथा वडाध्यक्ष गरी जम्मा ३४ पद रिक्त रहेको छ ।
