Suryodaya Online News

झापाको बुद्धशान्ति गाउँपालिका–४ स्थित श्री माध्यमिक विद्यालय बर्नेमा अभिभावक भेलाबाट नयाँ विद्यालय व्यवस्थापन समिति गठन गरिएको छ। भेलाबाट पवन ढकाल सर्वसम्मत रूपमा अध्यक्ष चयन हुनु भएको छ।समितिका सदस्यहरूमा शन्तोष शर्मा (अमर), सरिता किसान, सिमा परियार, राजकुमारी लिम्बू र उर्मिला ढुङ्गेल रहनुभएको छ। वडा प्रतिनिधिका रूपमा शेरबहादुर राय, सदस्य सचिवका रूपमा प्रधानाध्यापक टंकनाथ घिमिरे तथा शिक्षक प्रतिनिधिका रूपमा राज अर्याल चयन हुनुभएको छ।

कार्यक्रममा गाउँपालिका शिक्षा शाखाकी प्रतिनिधि झलका भट्टराई, वडा नं. ४ का अध्यक्ष शेरबहादुर राय, कार्यपालिका सदस्य दुर्गा पोख्रेल ढुङ्गेल, पूर्व अध्यक्षहरू नरेन्द्र कुमार भुर्तेल, शिक्षक अभिभावक संघ अध्यक्ष महानन्द गौतम लगायतको उपस्थिति रहेको थियो। साथै विभिन्न संघ–संस्थाका प्रतिनिधि, अभिभावक तथा स्थानीयहरूको उल्लेख्य सहभागिता थियो।

कार्यक्रममा शिक्षा शाखाका अधिकृत झलका भट्टराई, वडाध्यक्ष शेरबहादुर राय, निवर्तमान अध्यक्ष नरेन्द्र कुमार भुर्तेल तथा प्रधानाध्यापक टंकनाथ घिमिरेले विद्यालयका गतिविधि तथा कार्यक्रमबारे जानकारी दिँदै नवगठित समितिलाई शुभकामना व्यक्त गर्नुभएको थियो।शिक्षक प्रतिनिधि राज अर्यालले सञ्चालन गर्नुभएको कार्यक्रममा हाडियाचुली सामुदायिक वन उपभोक्ता समितिका अध्यक्ष राजन लिम्बू, समाजसेवीहरू रामबहादुर महत, सन्देश पौडेल, पदम आचार्य, गोविन्द ढुङ्गेल, मदन मगर, दुर्गा ढुङ्गेल, देवी अधिकारी, फक्तालुङ सावा, रुद्र न्यौपाने, तिला अर्याल लगायतको पनि सहभागिता रहेको थियो।

६९ औँ राष्ट्रिय सहकारी दिवसको अवसर पारेर झापाको बुद्धशान्ति-३ मा रहेको झिलमिले बहुउद्देश्यीय सहकारी संस्था लिमिटेडको कार्यालय औपचारिक रूपमा उद्घाटन गरिएको छ।सोही अवसरमा नयाँ वर्ष २०८३ को भित्तेपात्रो समेत विमोचन गरिएको छ ।संस्थाका अध्यक्ष मेनबहादुर तामाङको अध्यक्षतामा भएको कार्यक्रममा बुद्धशान्ति गाउँपालिका अध्यक्ष मनोज प्रसाईंको प्रमुख आतिथ्यता रहेको थियो ।

कार्यक्रममा बुद्धशान्ति १ का वडा अध्यक्ष अनिल वाग्ले, वडा नम्बर २ का कार्यवाहक वडाध्यक्ष सन्जु पौडेल, समाजसेवी चन्द्र कटुवाल, भुवन तामाङ, शिक्षासेवी गङ्गाराम गड्तौला, बिभिन्न संघसंस्थाका प्रतिनिधि, सञ्चालक समिति तथा लेखा समितिका पदाधिकारी, शेयर सदस्य लगायत विशिष्ट व्यक्तित्वहरूको उल्लेखनीय उपस्थिति रहेको थियो।कार्यक्रममा पानसमा दीप प्रज्वलन गर्दै २०८३ सालको भित्तेपात्रो विमोचन गरी कार्यालय उद्घाटन गरिएको थियो। कार्यक्रममा उपस्थित अतिथिहरूलाई संस्थाका कोषाध्यक्ष नर्वदा चापागाईं बाँस्कोटाले स्वागत मन्तव्य व्यक्त गर्नुभएको थियो भने कार्यक्रम सञ्चालन बुद्धशान्ति प्रेस क्लबका अध्यक्ष तीर्थराज तिम्सिनाले गर्नुभएको थियो।

कार्यक्रममा साना किसान कृषि सहकारीका अध्यक्ष केशव सापकोटा, बुद्धशान्ति प्रेस क्लबका उपाध्यक्ष नारायण अर्याल, बुद्धशान्ति उद्योग बाणिज्यसंघका प्रतिनिधि दुर्गा कुइकेल लगायतले शुभकामना मन्तव्य राख्नुभएको थियो ।

वि.सं. २०७१ साल माघ २० गते बुद्धशान्ति–३ मा स्थानीय ३० जना महिलाहरूको सक्रियतामा सुपारी किसानहरूसँग सहकार्य गरी उनीहरूको जीवनस्तर उकास्ने उद्देश्यले “झिलमिले महिला सुपारी सहकारी संस्था” को रूपमा यस संस्थाको स्थापना भएको थियो। प्रारम्भिक चरणमा ग्रामीण क्षेत्रमा सामान्य रूपमा सञ्चालन हुँदै आएको यस सहकारीले समयसँगै अनुभव र आवश्यकतालाई मध्यनजर गर्दै विनियम संशोधन गरी “झिलमिले बहुउद्देश्य सहकारी संस्था लिमिटेड” का रूपमा रूपान्तरण गरिएको हो।

“समृद्धिका लागि समुदायसँगसँगै” भन्ने मूल नाराका साथ पुनः सञ्चालनमा आएको यस संस्थाले सदस्यहरूको आवश्यकताअनुसार विभिन्न सेवामूलक तथा व्यवसायिक कार्यक्रमहरू सञ्चालन गर्ने लक्ष्य लिएको जनाएको छ।

कार्यक्रममा प्रमुख अतिथि लगायत अन्य अतिथिहरूले शुभकामना मन्तव्य व्यक्त गर्दै संस्थाको सफल कार्यकालको कामना गरेका थिए। साथै, आगामी दिनहरूमा आउने चुनौतीहरूको सामना गर्दै संस्थालाई अझ सशक्त रूपमा अघि बढाउन सुझाव समेत दिएका थिए।

झापाको  बुद्धशान्तिको ४ स्थित टिमाई शिविर छेउमा ८ गति विहान ८ बजे तिर निस्किएको चितुवालाई उद्धार गर्ने क्रममा सशस्त्र प्रहरी बल टिमाईका प्रमुख केदार श्रेष्ठ सहित चार जना घाईते हुनु भएको थियो । बुद्धशान्ति गाउँपालिका–४ टिमाईस्थित मकै बारिमा निस्किएको चितुवाको आक्रणबाट एक प्रहरीसहित चार जना घाइते हुनु भएको थियो ।( चैत ८ गते आइतवार) दिनको १ बजेको समयमा सोही स्थानका कमल खड्काको मकै बारीमा  घाइते अवस्थामा रहेको  चितुवाले आक्रमण गरेको हो । प्रहरी टोलिले डिविजन वन कार्यालय झापासँग आवश्यक समन्वय गरी उक्त  चितुवा नियन्त्रणमा लिनको लागि कोशि टप्पु बन्यजन्तु आरक्षण सुनसरीबाट साँझ ६ बजे बिज्ञ टोली आएर  चितुवालाई नियन्त्रणमा लिन खोज्दा बिच्किएर घटनास्थल सुरक्षामा खटिएका  सशस्त्र प्रहरी सुरक्षा बेस टिमाईका सहायक प्रहरी नायव निरिक्षक केदार श्रेष्ठलाई आक्रमण गरेको थियो ।

आक्रमणबाट श्रेष्ठको अनुहार, हात खुट्टा, कान, बायाँ पाखुरा लगायत शरिरको बिभिन्न भागमा चोट लागेर घाईते भए पछि उहाँलाई भागिरथा  बुद्धशान्ति अस्पतालमा प्राथमिक उपचार पछि उहाँलाई झापाको विर्तामोड स्थित वि एण्ड सि अस्पताल ल्याईएको थियो । थियो भने झापा बुद्दशान्ति–६ का ५० बर्षीय कृष्ण गजमेर, सोही स्थानका ५४ बर्षीय दुर्गा बबहादुर कटुवाल, र मेचीनगर नगरपालिका–१० का २६ बर्षीय बिशाल कार्की समेतलाइ  आक्रमण गरेर घाइते बनाएको थियो  ।

उहाँहरूरुको अवस्था सामान्य रहेको र घाईते तिनै जनाको भागिरथा न्यौपाने अस्पताल बुद्धशान्तिमा गरिएको थियो ।  उक्त चितुवाले स्थानियहरुलाई समेत आक्रमण गर्न थालेपछि स्थानियले कुटिपिट गर्दा चितुवाको मृत्यु भएको थियो ।

झापा । किरात याक्थुङ (लिम्बू) समुदायको प्रतिनिधिमूलक संस्था किरात याक्थुङ चुम्लुङ (कियाचु) को १२औं राष्ट्रिय महाधिवेशन झापाको भद्रपुर–चन्द्रगढीमा हुने भएको छ।

आज आयोजित पत्रकार सम्मेलनमार्फत महाधिवेशनको तयारी र कार्यक्रमबारे जानकारी दिइएको हो। वि.सं. २०४६ सालदेखि लिम्बू समुदायको सांस्कृतिक, भाषिक, सामाजिक तथा शैक्षिक क्षेत्रमा सक्रिय कियाचुले चैत १२, १३ र १४ गते महाधिवेशन आयोजना गर्ने जनाएको छ।उद्घाटन कार्यक्रम चैत १२ गते चन्द्रगढीस्थित मेची रंगशालाअगाडि खुला मैदानमा हुनेछ। कार्यक्रममा संस्थाका संस्थापक उपाध्यक्ष तथा पूर्वमन्त्री रकम चेम्जोङ प्रमुख आतिथ्य रहने बताइएको छ।
महाधिवेशनमा लिम्बुवानका ९ जिल्ला, उपत्यकाका ३ जिल्ला, साथै चितवन, ओखलढुंगा र कास्कीसहित विभिन्न जिल्लाबाट प्रतिनिधि तथा पर्यवेक्षक सहभागी हुनेछन्।

त्यस्तै प्रदेश १ को लिम्बुवान प्रदेश कार्यसमिति, बागमती प्रदेश, विभिन्न विषयगत संगठन तथा विदेशस्थित चुम्लुङका प्रतिनिधिसहित करिब ५०० जनाको सहभागिता रहने संघीय कार्यसमितिका महासचिव निरन्ती तुम्वापोले जानकारी दिए।

चैत १३ र १४ गते बन्दसत्र सञ्चालन हुने छ, जसमा संस्थाको सांगठानिक, प्रगति तथा आर्थिक प्रतिवेदनमाथि छलफल गरी पारित गरिनेछ। साथै मुकुम्लुङ संरक्षण, लिम्बुवान नामाङ्कन, कोशी प्रदेशको नामकरण, लिम्बू भाषाको अवस्था, संस्कार–परम्परा तथा आदिवासी अधिकारसम्बन्धी विषयमा समेत गहन छलफल हुने जनाइएको छ।महाधिवेशनले नयाँ कार्यसमिति समेत चयन गर्नेछ। आयोजकले कार्यक्रम सफल बनाउन सबै पक्षको सहयोग अपेक्षा गरेको छ। पत्रकार सम्मेलनमा संघीय सदस्य चन्द्रकला पालुङवा, अमृता योङहाङ, झापा जिल्ला अध्यक्ष सेसेहाङ फ्याकलगायतको उपस्थिति रहेको थियो।

झापाको बुद्धशान्ति गाउँपालिका वडा नं –३ स्थित साकेला थान नजिक धुलाबारी–बुधबारे भित्री सडक खण्डमा आज साँझ ६:४० बजे सवारी चेकजाँचका क्रममा लागूऔषध जस्तो देखिने पदार्थ बरामद गरिएको छ। निर्वाचन क्षेत्र नं. १ को सुरक्षार्थ खटिएको टोलीले सशस्त्र प्रहरी नायब निरीक्षक केदार श्रेष्ठको कमाण्डमा धुलाबारीबाट बुधबारेतर्फ आउँदै गरेको प्र १–०१–००२ ह ६१७ नम्बरको अटो जाँच गर्ने क्रममा उक्त पदार्थ फेला पारेको हो। टोलीमा ९ जना सुरक्षाकर्मी परिचालित थिए।

जाँचका क्रममा अटो चालक झापा जिल्ला बुद्धशान्ति गाउँपालिका–४ बस्ने वर्ष २३ का सनम शेर्पाको साथबाट १.०१ ग्राम लागूऔषध जस्तो देखिने खैरो लिसाइलो पदार्थ बरामद भएको सशत्र प्रहरीले जनाएको छ।

बरामद गरिएको पदार्थ, अटो तथा चालकलाई आवश्यक कानुनी कारबाहीका लागि साँझ ७:५० बजे इलाका प्रहरी कार्यालय धुलाबारीमा बुझाइएको छ। घटनाबारे थप अनुसन्धान भइरहेको जनाइएको छ।

यस सम्बन्धमा सशस्त्र प्रहरी बल नेपाल नं. २ गण मुख्यालय झापाका सूचना अधिकारी सशस्त्र प्रहरी नायब उपरीक्षक रोहित बहादुर घिमिरेले घटनाको पुष्टि गर्दै कानुनी प्रक्रिया अगाडि बढाइएको जानकारी दिनु भयो ।

झापा क्षेत्र नं. २ का प्रतिनिधिसभा सदस्य पदका उम्मेदवारसँग मतदाताको प्रत्यक्ष संवाद कार्यक्रम बिर्तामोडमा आयोजना हुने भएको छ।

वीरता जेसीज, अर्जुनधारा जेसीज, बुधबारे जेसीज र सुरुङा जेसीजको संयुक्त आयोजनामा ‘मतदातासँग प्रत्यक्ष संवाद (ककस)’ कार्यक्रम सञ्चालन गर्न लागिएको हो।

नेपाल जेसीजको परिपत्रअनुसार तथा संवाद समूह झापाको सहजीकरणमा कार्यक्रम भोलि फागुन ११ गते दिउँसो १ बजे बिर्तामोडस्थित अतिथि सदनमा आयोजना हुने आयोजकले जनाएको छ।

कार्यक्रममा झापा क्षेत्र नं. २ का प्रतिनिधिसभा सदस्य पदका उम्मेदवारहरूले आफ्ना चुनावी योजना, नीति तथा प्रतिबद्धताबारे मतदातासमक्ष धारणा प्रस्तुत गर्नेछन्। साथै मतदाताले उम्मेदवारसँग प्रत्यक्ष रूपमा प्रश्न राख्ने अवसर पाउने आयोजकले जानकारी दिएको छ।

लोकतान्त्रिक अभ्यासलाई बलियो बनाउने, मतदाता सचेतना अभिवृद्धि गर्ने तथा जिम्मेवार नेतृत्व चयनमा सहयोग पुर्‍याउने उद्देश्यले कार्यक्रम आयोजना गरिएको जनाइएको छ। कार्यक्रममा पत्रकार, नागरिक समाजका प्रतिनिधि, विभिन्न संघ–संस्थाका प्रतिनिधि तथा सर्वसाधारणको सहभागिता रहने अपेक्षा गरिएको छ। लोकतान्त्रिक संवादलाई प्रभावकारी बनाउन कार्यक्रममा सहभागी हुन आयोजकले सबै सरोकारवालालाई आग्रह गरेको छ।

झापाको बुद्धशान्ति गाउँपालिका ४, बाझो खेतस्थित बिमला घिमिरेको आगलागीबाट आफ्नै घरसहित सर्वस्व गुमाएकी बिमला घिमिरेको परिवारलाई सहयोग जुट्ने क्रम निरन्तर जारी रहेको छ ।

सहयोग कै क्रममा बुद्धशान्ति १ बुधबारे स्थिति  कर्णाली एजुकेसन फाउन्डेसनको टोली पीडितको घरमा पुगेर अवस्थाबारे जानकारी लिएको छ। आगलागी पछि घर पुनर्निर्माणको कार्य भइरहेको पाइएको छ।संस्थाका प्रतिनिधिहरूले आवश्यक सामग्री र सहयोगका विषयमा बुझ्दा पीडित पक्षले तत्काल पानी ट्यांकीको आवश्यकता रहेको जानकारी गराएका थिए।

सोही आवश्यकतालाई मध्यनजर गर्दै कर्णाली एजुकेसन फाउन्डेसनले एक थान पानी ट्यांकी तुरुन्तै उपलब्ध गराएको छ। संस्थाले विपद्को समयमा मानवीय सहयोग गर्नु आफ्नो सामाजिक दायित्व भएको उल्लेख गर्दै आगामी दिनहरूमा पनि यस्ता सामाजिक कार्यलाई निरन्तरता दिने प्रतिबद्धता जनाएको छ।स्थानीयवासीहरूले संस्थाको यस सह्राहनीय कार्यको प्रशंसा गरेका छन्। समाजको साझा प्रयासले आगलागीपीडित घिमिरे परिवारको पुनर्निर्माणमा आशा र भरोसा थपिएको स्थानीयले बताएका छन

एक्स्ट्रिम सातौँ झापा गोल्डकप विनोद बस्नेत स्मृति संस्करणको उपाधिका लागि आज मछिन्द्र फुटबल क्लब र एपिएफ फुटबल क्लब प्रतिस्पर्धा गर्दैछन् ।

झापा गोल्डकपमा मछिन्द्र पहिलोपटक र एपिएफ लगातार दोस्रोपटक फाइनल खेल्दैछ । सातवटै संस्करणमा सहभागी एपिएफ र दोस्रोपटक सहभागी मछिन्द्र दुवै क्लबले उपाधि जित्ने दाबी गरेका छन् ।

मछिन्द्रका प्रशिक्षक प्रवेश कटवालले अहिले चलिरहेका अन्य चर्चित प्रतियोगिता छोडेर झापा गोल्डकपमा फोकस गरेको बताए । उनले मछिन्द्रको ए टिम मैदानमा उतार्ने बताएका छन् । उनले अधिकांश झापाली खेलाडी समेटेर बनाएको टिमलाई दर्शकको समर्थनसमेत जितको एउटा आधार हुने बताए ।

त्यस्तै, एपिएफका प्रशिक्षक राजेन्द्र तामाङले राष्ट्रिय लिगमा समेत उच्च प्रदर्शन गरेका र नियमित क्याम्पमा रहेका पहिलो दर्जाका खेलाडीले सशक्त प्रदर्शन गर्ने बताए । उनले पनि झापा गोल्डकपलाई नै फोकस गरेर केही समयदेखि पूर्ण तयारी गरेको जानकारी दिए ।

मछिन्द्रका कप्तान विशाल श्रेष्ठले अधिकांश खेलाडी मैदानसँग परिचित भएका कारण होम ग्राउन्डमा खेलेको अनुभव हुने भएको भन्दै त्यसले सहज हुने बताए ।

एपिएफका कप्तान हरि कार्कीले आयोजक टोलीलाई पराजति गरेर मनोबल उच्च बनाएको बताए । आज डोमालाल राजवंशी रंगशालामा हुने फाइनलमा उपाधि हात पारेर झापा गोल्डकपको इतिहाँसमा नयाँ रेकर्ड बनाउने विश्वास व्यक्त गरे ।

प्रतियोगिताको विजेताले ट्रफीसहित १५ लाख र उपविजेताले ७ लाख ५० हजार रुपैयाँ पुरस्कार पाउनेछ । प्रतियोगिताको सर्वोत्कृष्ट खेलाडीले यामाहा कम्पनीको एउटा मोटरसाइकल प्राप्त गर्ने आयोजकले जनाएको छ ।

विधागततर्फ उत्कृष्ट प्रशिक्षक, सर्वाधिक गोलकर्ता र उत्कृष्ट गोलकिपरले जनही ३५ हजार रुपैयाँ पुरस्कार पाउने छन् । प्लेयर अफ द म्याचले २५ हजार रुपैयाँ पाउनेछन् ।
प्रतियोगिताभरि प्लेयर अफ द म्याच र विधागत पुरस्कार अमेरिका निवासी रोशनलाल श्रेष्ठ तथा उनका साथीहरुले प्रदान गर्दै आएका छन् ।

यसैबीच, प्रतियोगितामा बिर्तामोडको महेन्द्ररत्न स्टोर्सले प्रत्येक दिन टिकट लिएर खेल हेर्ने दर्शकमध्ये एकजनालाई एकथान टेलिभिजन उपलब्ध गराउँदै आएको छ ।

त्यस्तै, पहिलो दिनदेखि फाइनल खेलसम्म टिकट लिएका एकजना दर्शकलाई यामाहाको स्कुटर प्रदान गरिने आयोजकले जनाएको छ ।

टाइब्रेकरमा भाग्यमानी सावित हुँदै सशस्त्र प्रहरी बलको एपिएफ फुटबल क्लब झापाको डोमालाल राजवंशी रंगशालामा जारी एक्स्ट्रिम सातौँ झापा गोल्डकप फुटबल प्रतियोगिताको फाइनलमा प्रवेश गरेको छ ।

एफिएफले आयोजकको टिम झापा–११ फुटबल क्लबलाई टाइब्रेकरमा ४–२ गोल अन्तरले पराजित गर्दै फाइनल यात्रा तय गरेको हो । एक गोलले पछि परेको अवस्था उल्टाउँदै एपिएफले कमब्याक जित हासिल गरेको हो ।जितसँगै एपिएफले कम्तिमा ७ लाख ५० हजार रुपैयाँ सुरक्षित गरेको छ । एपिएफका लागि सुमन श्रेष्ठ, दिपेश धिमाल, सन्तोष खत्री र समिराज थोकरले गोल गरेका थिए भने नविन लामाको प्रहार झापाका गोलकिपर सन्दिप लिम्बुले रोकेका थिए ।

झापाका तर्फबाट भने रोमन भुजेल र रोहन कार्कीले मात्र गोल गरेका थिए । नारायण क्षेत्री र गौरव धिमालको बल एपिएफका गोलकिपर एञ्जल श्रेष्ठले बचाएका थिए ।खेलको ६१ औँ मिनेटमा झापाले अग्रता लियो । नारायण क्षेत्रीको कर्नर प्रहारमा झापाका विदेशी खेलाडी रिचार्ड विल्सनले गोल गर्न सफल भए ।

झापाको अग्रता ६ मिनेट पनि टिक्न सकेन । एपिएफका स्ट्राइकर नविन लामाले ६७ औँ मिनेटमा खेललाई बराबरीको अवस्थामा पुर्याए । लामाले डिबक्स बाहिरबाट गरेको प्रहार क्रस बारमा लाग्दै गोलमा परिणत भएको थियो ।
३९ औँ मिनेटमा रोहन कार्कीको प्रहार बारमा लागेर फर्किंदा खेलमा अग्रता लिने अवसरबाट बञ्चित भएको थियो । खेलको ५७ औँ मिनेटमा झापाका रिचार्ड विल्सनको लङ रेञ्जर सट बारको केही माथिबाट बाहिरिएको थियो ।

एपिएफले ३० औँ मिनेटमा अग्रता लिने अवसर गुमाएको थियो । दिपेश धिमालले पाएको सुन्दर अवसर खेर फालेका थिए ।
खेलको प्लेयर अफ द म्याच विजेता टिम एपिएफका गोलकिपर एञ्जल श्रेष्ठ भए । उनले नगद २५ हजार रुपैयाँ पुरस्कार पाए । भोलि शनिबार अन्तिम सेमिफाइनल खेल त्रिभुवन आर्मी फुटबल क्लब र मछिन्द्र फुबटल क्लबबीच हुनेछ ।

यसैबीच, प्रतियोगितामा बिर्तामोडको महेन्द्ररत्न स्टोर्सले प्रत्येक दिन टिकट लिएर खेल हेर्ने दर्शकमध्ये एकजनालाई एकथान टेलिभिजन उपलब्ध गराउँदै आएको छ ।

त्यस्तै, पहिलो दिनदेखि फाइनल खेलसम्म टिकट लिएर एकजना दर्शकलाई यामाहाको स्कुटर प्रदान गरिने आयोजकले जनाएको छ ।

प्रतियोगिताको विजेताले नगद १५ लाख र उपविजेताले ७ लाख ५० हजार रुपैयाँ पुरस्कार पाउनेछ । प्रतियोगिताको उत्कृष्ट खेलाडीले यामाहा कम्पनीको एउटा मोटरसाइकल प्राप्त गर्ने आयोजकले जनाएको छ ।

विधागततर्फ उत्कृष्ट कोच, हाई स्कोरर र उत्कृष्ट गोलकिपरले जनही ३५ हजार रुपैयाँ पुरस्कार पाउने छन् । प्रतियोगिताको फाइनल खेल फागुन ४ गते हुनेछ ।