मेची राजमार्गमा पराल बोकेको पिकअप जलाएको आरोपमा पक्राउ परेका युवक दुई लाख रुपैयाँ धरौटी तिरेर रिहा भएका छन् । जिल्ला अदालतले झापाको बुद्धशान्ति गाउँपालिका–४ का ३३ वर्षे अञ्जन राई बुलेट किराती लाई आज बिहीबार रिहा गरेको हो ।
बुधबार नै अदालतले उनलाई धरौटी माग गरेको थियो । तर, उनी आज तोकिएको धरौटी बुझाएर रिहा भएको अदालतका स्रेस्तेदार इन्द्रकुमार श्रेष्ठले बताए । ‘उनीविरुद्ध आपराधिक उपद्रव मुद्दा दर्ता छ,’ श्रेष्ठले भने, ‘राईको मुद्दामा अदालतले थप प्रक्रियागत कार्य गर्नेछ ।’
कोशी प्रदेशको नाम परिवर्तन गर्न माग गर्दै आन्दोलनरत समूहले गत मंसिर ३० र पुस १ गते मेची राजमार्गसहित केही स्थानमा यातायात बन्द आह्वान गरेको थियो । यहीबेला इलामको रोङ गाउँपालिका–४, कोल्बुङको किटेनीस्थित मेची राजमार्गमा मे १ च ११४० नम्बरको पिकअप आगजनी गरिएको थियो ।
झापाबाट पराल बोकेर आइरहेको पिकअप आगजनी गरेको भन्दै प्रहरीले राईलाई पुस २ मा पक्रेको थियो । र, प्रहरीले उनीविरुद्ध १० लाख रुपैयाँको क्षति दाबी गरेको छ ।
राई पक्राउको विरोधमा ‘पहिचानसहितको प्रदेश नम्बर १ पुनः नामांकन समिति’सहित पाँच समूहले हिजो र आज मेची राजमार्ग बन्द आह्वान गरेका थिए । राईलाई रिहा गरेपछि आज दिउँसो २ बजेदेखि बन्द खुलेको थियो ।
तर, मंसिर ३० गते मेची राजमार्गमा पिकअप जलाइएको घटनामा आन्दोलनरत समूहका कोही पनि संलग्न नभएको, आन्दोलन शान्तिपूर्ण रूपमा आह्वान गरिएको र शान्तिपूूर्ण नै भएको दाबी आन्दोलनरत समूहको छ । राई पहिचानसहितको प्रदेश नम्बर १ पुनः नामांकन समिति झापाका नेता भएपनि उनलाई झुटो मुद्दा लगाइएको समिति अध्यक्ष डकेन्द्रसिंह थेगिमले बताए ।
रिहा गरिएपछि राईलाई आज इलाम चोकबजारमा पहिचानवादी समूहले खादा र अबिरले स्वागतसमेत गरेका छन् ।
