राष्ट्रिय प्रजातन्त्र पार्टी (राप्रपा) भद्रपुर नगर समितिले राज्यद्वारा गरिएको दमन र शासन व्यवस्थाको विरोधमा हिजो प्रदर्शन गरेको छ।
झुट्टा मुद्दामा पक्राउ परेका राप्रपा नेता तथा अन्य राष्ट्रवादीहरूको रिहाइ, मृतकलाई सहिद घोषणा, घटनाको निष्पक्ष छानबिन, र सरकारको राजीनामालगायत माग राख्दै मसाल जुलुस गरिएको हो।
भद्रपुर नगर समितिको आयोजनामा भएको विरोध सभामा सयौँ राप्रपा नेता तथा कार्यकर्ताको उपस्थिति थियो।
शान्तिपूर्ण रूपमा सुरू भएको जुलुस राप्रपा पार्टी कार्यालय जनता चोकबाट सुरु भई भद्रपुर बजार पुगेर कोणसभामा परिणत भएको थियो।
बिरोध जुलुस भद्रपुर बजार पुग्नै लाग्दा प्रहरीले राको खोस्ने प्रयास गरेको थियो भने जुलुस अवरोध गर्न खोजेपछि प्रदर्शनकारीले प्रहरी प्रशासनविरुद्ध चर्को नाराबाजी गरेका थिए।
भद्रपुर बजारमा सम्पन्न कोणसभालाई भद्रपुर नगर अध्यक्ष राजकुमार राई र राप्रपाका सहमहामन्त्री भरतेन्दु कुमार मल्लिकले सम्बोधन गरेका थिए।
मल्लिकले भ्रष्ट र अक्षम सरकारविरुद्ध राप्रपाले निरन्तर आन्दोलन गर्ने र व्यवस्थाको परिवर्तन राप्रपाकै नेतृत्वमा हुने दाबी गरे।
नगर अध्यक्ष राईले सदनदेखि सडकसम्म राप्रपा नै एकमात्र प्रतिपक्षी दल रहेको दाबी गर्दै, देशलाई यो संकटबाट पार लगाउन तथा हिन्दू राष्ट्रसहित राजसंस्था पुनःस्थापना गर्न शान्तिपूर्ण संघर्ष जारी राख्ने बताए।
उनले सरकारको समर्थनमा काम गर्ने प्रहरी प्रशासनलाई चुनौती दिँदै उपस्थित सम्पूर्ण राप्रपा कार्यकर्तालाई पक्राउ गर्न हिम्मत भए प्रयास गर्न भने।
गत चैत १५ गते काठमाडौँमा भएको प्रदर्शनमा राप्रपाका महामन्त्री धवल शमशेर राणा र वरिष्ठ उपाध्यक्ष रविन्द्र मिश्र पक्राउ परेका थिए।
उनीहरूको रिहाइको मागसहित राप्रपाले देशव्यापी आन्दोलन गरिरहेको छ भने आगामी दिनमा पनि यसलाई निरन्तरता दिने जिल्ला अध्यक्ष केशवप्रसाद ओझाले बताए।
