मानवीय सेवाको क्षेत्रमा अग्रणी भूमिका निर्वाह गर्दै आएको नेपाल रेडक्रस सोसाइटी अन्तर्गत नेपाल रेडक्रस सोसाइटी बुद्धशान्ति उपशाखा बुधबारे को २५ औँ उपशाखा सभा तथा प्रथम पालिका शाखा अधिवेशन सम्पन्न भएको छ।
मानवता, निष्पक्षता, स्वेच्छा सेवा तथा सामाजिक उत्तरदायित्वको भावनालाई आत्मसात् गर्दै समाजमा निरन्तर सेवा पुर्याउँदै आएको रेडक्रसको योगदानलाई स्मरण गर्दै कार्यक्रम आयोजना गरिएको हो ।
बुद्धशान्ति गाउँपालिकाको सभाहलमा आयोजित कार्यक्रममा नेपाल रेडक्रस सोसाइटी बुद्धशान्ति पालिका शाखाका संयोजक पुष्पराज भट्टराईको अध्यक्षता तथा बुद्धशान्ति गाउँपालिका अध्यक्ष मनोज प्रसाई को प्रमुख आतिथ्यता रहेको थियो। कार्यक्रममा सशस्त्र प्रहरी टिमाई बेस क्याम्पका प्रमुख, ट्राफिक प्रहरी कार्यालय बुधबारेका इन्चार्ज, मङ्गलद्वीप बचत तथा ऋण सहकारी संस्था लिमिटेड का अध्यक्ष लोकनाथ गौतम, पूर्व अध्यक्ष हरिप्रसाद पोख्रेल, सीता निरौला लगायत विभिन्न संघसंस्थाका प्रतिनिधि तथा रेडक्रसकर्मीहरूको उल्लेखनीय उपस्थिति रहेको थियो ।
पानसमा दीप प्रज्वलन गरी उद्घाटन गरिएको कार्यक्रममा उपस्थित सम्पूर्ण अतिथिलाई पालिका शाखाका सचिव जितबहादुर श्रेष्ठले स्वागत मन्तव्य व्यक्त गर्नुभएको थियो भने उपशाखाका सचिव टंक निरौलाले कार्यक्रम सञ्चालन गर्नुभएको थियो ।
कार्यक्रमको अवसरमा अध्यक्ष पुष्पराज भट्टराईले उपशाखाले हालसम्म सञ्चालन गरेका मानवीय सेवा, विपद् राहत, स्वास्थ्य तथा सामाजिक गतिविधिहरू समेटिएको प्रगति प्रतिवेदन तथा भावी नीति तथा योजना सार्वजनिक गर्नुभएको थियो । त्यसैगरी सचिव टंक निरौलाले आय–व्यय विवरण प्रस्तुत गर्नुभएको थियो ।
कार्यक्रममा बोल्दै पूर्व अध्यक्ष हरिप्रसाद पोख्रेल, मङ्गलद्वीप बचत तथा ऋण सहकारी संस्था लिमिटेडका अध्यक्ष लोकनाथ गौतम, ट्राफिक प्रहरी बुधबारेका इन्चार्ज चन्द्र राहुत तथा प्रमुख अतिथि मनोज प्रसाईले नेपाल रेडक्रस सोसाइटीको स्थापना, इतिहास तथा मानव सेवामा पुर्याउँदै आएको योगदानबारे चर्चा गर्नुभएको थियो ।
उहाँहरूले रेडक्रसले विपद्, महामारी, रक्तदान, स्वास्थ्य सेवा तथा सामाजिक सहयोगका क्षेत्रमा पुर्याएको योगदान प्रशंसनीय रहेको बताउनुभयो ।
शुभकामना मन्तव्यका क्रममा वक्ताहरूले संस्थालाई आवश्यक सहयोग र सहकार्य निरन्तर रहने प्रतिबद्धता व्यक्त गर्नुभएको थियो।
गाउँपालिका अध्यक्ष मनोज प्रसाईले पनि गाउँपालिकाले रेडक्रससँग समन्वय गर्दै विभिन्न मानवीय तथा सामाजिक कार्यक्रमहरूमा निरन्तर सहयोग गर्दै आएको र आगामी दिनमा समेत सहकार्यलाई थप सशक्त बनाइने बताउनुभयो ।
मानवता र सेवाभावलाई केन्द्रमा राखेर समाजमा क्रियाशील रहेको नेपाल रेडक्रस सोसाइटी बुद्धशान्ति उपशाखाले आगामी दिनमा पनि सामाजिक तथा मानवीय सेवाका गतिविधिलाई अझ प्रभावकारी रूपमा अगाडि बढाउने विश्वास व्यक्त गरिएको थियो ।
