निराजन निरौला । झापाको बिर्तामोडमा ‘सिर्जनशील गजल महफिल – २०८०’ कार्यक्रम भव्यताका साथ सम्पन्न भएको छ । सिर्जनशील समाजिक युवा समूह नेपालले आयोजना गरेको महफिलमा पाँच जना गजलकारहरुको प्रस्तुति रहेको थियो । जसमा धनकुटाका गजलकार याक्थुङ्बा कान्छा, पाँचथरका मृदुल आङ्बो, पाँचथरकै पवन अधिकारी, त्यस्तै झापाकी सुनिता तामाङ र इलामकी अञ्जीला थामी अर्पणाले पाँच-पाँच वटा गजलहरु वाचन गर्नुभएको थियो ।
दुई शृङ्खलामा बिभाजित महफिलको पहिलो शृङ्खलामा प्रत्येक गजलकारले दुई-दुई वटा गजलहरु वाचन गर्नुभएको थियो भने दोश्रो शृङ्खलामा तीन-तीन वटा गजलहरु वाचन गर्नुभएको थियो । मिलन, बिछोड, खुसी, रोदन, देशभक्ति लगायतमा आधारित गजलले दर्शकहरुको मनमात्र तानीरहेको थिएन एकसाथ दर्शकहरुको ‘वा…..वा…., Once More’ का आवाजहरु पनि आइरहेका थिए । निरन्तर करिब तीन घण्टा चलेको महफिलको पत्तै नपाइ समय वितेको दर्शकहरुको प्रतिकृया थियो । सिर्जनशील गजल महफिलमा आउँदा साच्चै नै महफिलको जस्तो अनुभूति भएको कार्यक्रमका प्रमुख अतिथि विवश बलिभद्रले बताउनुभयो । “महफिलको आफ्नै नियम र दायराहरु हुन्छन्” उहाँले भन्नुभयो “जुन आयोजकले गरेको व्यवस्थानमा कुनै खोट छैन ।” महफिललाई सफल बनाउन गजलकारहरुको ठुलो भूमिका रहेको उहाँको प्रतिकृया थियो । त्यस्तै कार्यक्रमका बिशिष्ट अतिथि सुन्दर कुरुपले गजल आफैँमा समाज बोल्न सक्ने विधा भएको बताउनुभयो ।
सुदूरपूर्वमा पातल्ली रहेको गजलबिशेष कार्यक्रमलाई यो महफिलले पुनर्जागरण गरेको उहाँको प्रतिकृया थियो । त्यस्तै बिशिष्ट अतिथि खगेन्द्रा खुसीले गजलमा यदाकदा बिबादका कुराहरु आइरहे पनि अहिलेका पुस्ताले गजल बिधालाई धेरै मन पराएको बताउनु भयो । यि र यस्ता कार्यक्रमले विधालाई पुस्तान्तरणमा ठुलो भुमिका खेल्दै निखारीन सहयोग पुर्याउने उहाँले बताउनुभयो । त्यसैगरी धेरै अवार्ड र सम्मानबाट सम्मानित भइसक्नुभएकि गजलकार तथा कवि कविता राईले गजलले आफुलाई उच्च र लोभलाग्दो रुपमा स्थापना गरेकोमा हर्ष व्यक्त गर्नुभयो । तर गजललाई अहिले पनि राष्ट्रिय मान्यता नदिएको प्रति दु:ख व्यक्त गर्दै यस्ता कार्यक्रमले गजल विधालाई राष्ट्रिय मान्यता दिन सरकारलाई चुनौति दिने उहाँको भनाइ थियो ।
भौतिक उपस्थितिमा बैठक बसेर कार्यक्रम गर्ने परिपाटी रहिआएको र त्यहि अभ्यासहरु भइरहेको अवस्थामा यस संस्थाले एउटा फरक र नयाँ अभ्यास गरेको स्वागत मन्तव्यका क्रममा सिर्जनशील सामाजिक युवा समूह नेपालका उपाध्यक्ष निराजन निरौलाले बताउनु भयो । कार्यक्रम गर्न तन, मन र वचनले दृढताका साथ लागेमा सफल भइने रहेछ भन्ने संदेश प्रवाह गर्ने उद्येश्य लिएको उहाँको भनाइ थियो । कार्यक्रमको मुख्य आकर्षण तथा गजकारहरु र बिशिष्ट अतिथिहरुलाई प्रमुख अतिथिको हातबाट मायाको चिनो बितरण भएको थियो । प्रमुख अतिथिलाई संस्थाकि बरिष्ठ उपाध्यक्ष समिक्षा छिलिङ, उपाध्यक्ष निराजन निरौला लगायत संस्थाका पदाधिकारीहरुले मायाको चिनो वितरण गर्नुभएको थियो
कार्यक्रमको समापन गर्दै संस्थाकि बरिष्ठ उपाध्यक्ष तथा कार्यक्रमकि अध्यक्ष समिक्षा छिलिङ राईले कार्यक्रम गर्न धेरै कठिन र चुनौतिपूर्ण भएपनि सबैको साथ, सहयोग, हौसला र उत्प्रेरणाले सहज महशुस भएको बताउनुभयो । जुनसुकै परिस्थितिमा भएर पनि संस्थाको निम्तोलाई स्विकार गरेर आउनु भएका सबै अतिथिहरुलाई उहाँले धन्यवाद ज्ञापन गर्नुभयो । बिर्तामोडको साइ पार्टी प्यालेसमा सम्पन्न कार्यक्रमको संचालन संस्थाकी सचिव जीना अधिकारीले गर्नुभएको थियो । अभागी थेगुवा, केशव आचार्य, भगवती ढुङ्गेल, बिराट किराँती, दिलिप घिमिरे लगायत थुप्रै अग्रज स्रष्टाहरुको उपस्थिति रहेको कार्यक्रमलाई सफल बनाउन संस्थाका सल्लाहकार भिम बिरही राईको ठुलो भुमिका रहेको थियो ।
