Suryodaya Online News

इलामको सूर्योदय नगरपालिकाले चालु आर्थिक बर्षको छ महिनामा भएका गतिविधि सार्वजनिक गरेको छ । दिर्घकालिन सोच अन्तर्गत सूर्योदय नगरपालिकाको समृद्धता,प्राङ्गारिक कृषि, पर्यापर्यटन र आर्थिक समानता तर्फ नगरलाई उन्मुख गराउन विभिन्न नीति तथा कार्यक्रम तय गरि बजेट बिनियोजन गरिएको नगरप्रमुख रणबहादुर राईले बताउनुभएको छ ।
चालु आ÷ब का लागि नगरसभाले स्वीकृत गरेको एक अर्ब २६ करोड २६ लाख ७९ हजार बजेटमध्ये २४ प्रतिशत खर्च गरिएको प्रवक्ता ख्याम बहादुर भुजेलले जानकारी दिनुभयो । नगरपालिकाको गतिविधि सार्वजनिक गर्न आईतबार आयोजना गरिएको नियमित पत्रकार सम्मेलनमा भुजेलले सो जानकारी दिनुभएको हो ।

अब तेश्रो त्रैमासिकमा धेरै बजेट खर्च हुने नगरपालिकाको अनुमान छ । ‘यतिबेला धेरै ठेक्काहरु सम्झौता भएर कार्यान्वयनको चरणमा रहेका छन्, ठुला आयोजनाहरुको डिपिआर देखि सम्झौतासम्म समय लाग्ने भएकाले अब कार्यान्वयनको चरण शुरु भएको छ,धमाधम काम हुन्छ ।’ उहाँले भन्नुभयो ।

नगरपालिकाले २८ बर्षे दिगो योजना निर्माण गरेर अल वेदर रोड निर्माण गरिरहेको राईले बताउनुभयो । ‘प्रत्येक वडामा एउटा हुने गरि १४ वडामा ६६५ किलोमिटर सडक निर्माण गर्न २८ बर्षे दिगो योजना निर्माण गरेका छौँ । त्योमध्ये चार बर्ष बितेको छ, अब २४ बर्ष बाँकी छ ।’ उहाँले भन्नुभयो, ‘प्रत्येक बर्षको लक्ष्य किटान गरिएको छ,प्रगति राम्रो छ ।’

शुरुवात गर्दा तीन सय मिटर मात्र अलवेदर रोड र कालोपत्रे सडक १ दशमलव ३ किलोमिटर मात्र रहेको बताउँदै राईले हाल मेची राजमार्ग भन्दा बाहेक १३ किलोमिटर कालोपत्रे र एक सय दश किलोमिटर अल वेदर रोड निर्माण भैसकेको जानकारी दिनुभएको छ ।
शिक्षा युवा तथा खेलकुद शाखाले नगरपालिकामा धेरै काम सम्पन्न गरेको शाखा प्रमुख योगनिधि भट्टराईले बताउनुभयो । ‘अघिल्लो त्रैमासिकमा २० वटा कार्यक्रम सम्पन्न भएका छन्, विद्यार्थीको गणित तथा विज्ञान प्रयोगशाला,छोरी बुहारीलाई शिक्षा,एक सय दिनको रोजगारी जस्ता कार्यक्रम महत्वपुर्ण छन् ।’ भट्टराईले भन्नुभयो

सामाजिक क्षेत्रमा ज्येष्ठ नागरिक, एकल विधवा महिला, अपांगता भएका ब्यक्तिहरुका लागि स्वास्थ्य बिमा अगाडि बडाएको नगरपालिकाले जनाएको छ । ‘वैदेशिक रोजगारबाट फर्किएकाहरुका लागि सामाजिकीकरणको कार्यक्रमको लागी सात सय ५३ वटा स्थानीय तह मध्ये कोशी प्रदेशका १० वटा पालिकालाई नमुना बनाउने संघिय सरकारको कार्यक्रम अन्तर्गत सूर्योदय नगरपालिका एक नम्बरमा रहेको जानकारी गराउँदछु ।’ नगरप्रमुख राईले भन्नुभयो ।

दुधको उत्पादन वृद्धि गर्ने उद्धेश्यले शुरु गरेको सेक्स सिमेनको प्रयोग प्रभावकारी भएको नगरपालिकाले बताएको छ । दुध उत्पादन बडाएर पालिकाभित्रै पाउडर प्लान्ड सञ्चालन गर्ने उद्धेश्यका सााथ नगरपालिकाले किसानको ५० प्रतिशत लगानीमा सेक्स सिमेन वितरण गरिरहेको हो । सेक्स सिमेनबाट ९५ प्रतिशत बाछि नै जन्मिएको तथ्यांक छ । हाल दुई हजारको हाराहारीमा सेक्स सिमेन खरिद गरिएकोमा सातसय भन्दा धेरै प्रयोग भैसकेको पत्रकार सम्मेलनमा जानकारी गराईएको छ । हालसम्म सेक्ससिमेनबाट २ सय ८५ वटा बाछा बाछी जन्मिएका छन् । ती मध्ये ९५ प्रतिशत बाच्छी रहेको राईले बताउनुभयो ।

३९०० पर्ने उक्त सेक्स सिमेन प्रयोग गर्दा त्यसको पचास प्रतिशत किसानले ब्यहोर्नु पर्ने छ । आफुखुसी खरिद गर्न नपाईने नेपाल सरकारको मापदण्डभित्र रहेर लिएको सेक्स सिमेन अमेरिका र क्यानेडाको मात्र प्रयोग गरिएको प्रमुख राईले जानकारी दिनुभयो । अहिले जन्मिएका बाछीहरु ठुलो माउ जस्तो देखिन्छन् । ‘पहिले गाई बाँडिरहेका थियौँ तर, ती गाईले दुईलाख लिटर दुध दिनको पुर्याउन नसकिने भएपछि धेरै दुध उत्पादन गर्न सेक्स सिमेनको शूरुवात गरेका हौँ ।’ उहाँले भन्नुभयो, ‘राज्यको अनुदान खर्च भएका कारण सेक्स सिमेनबाट जन्मिएका बाछी पाँच बर्षसम्म बिक्री गर्न प्रतिबन्ध छ ।’

प्रत्येक वर्ष सौर मासअनुसार माघ महिनाको पहिलो दिन मनाइने माघे सङ्क्रान्ति पर्व  देशभर स्नान, जप, तप, ध्यान साधना, दानआदि गरी मनाइँदै छ ।

माघे सङ्क्रान्तिका दिन देवघाट, त्रिशूली, कालीगण्डकी, वाग्मती, इन्द्रावती, त्रिवेणी, रिडीलगायतका स्थानमा माघ स्नान गर्न भक्तजनको भीड लाग्छ। ती ठाउँमा विशेष मेलासमेत लाग्ने गर्छ । सूर्य धनु राशिबाट मकर राशिमा प्रवेश गर्ने भएकाले माघ १ गतेलाई मकर सङ्क्रान्ति पनि भनिन्छ भने माघ १ गतेदेखि सूर्य उत्तरायण हुने भएकाले दिनभन्दा रात छोटा हुँदै जान्छन् ।

धर्मसिन्धुमा माघे सङ्क्रान्तिको दिन घ्यू, चाकु, तिलका परिकार, खिचडी नखाने, दान नगर्ने, जलाशयमा गई स्नान नगर्ने, ध्यान नगर्ने व्यक्ति जीवनभर रोगी हुने मान्यता छ । सूर्य उत्तरायण हुने दिनको स्नान, जप, तप, ध्यान साधना, दान आदिलाई पुण्य दायक मानिन्छ ।

तराईवासीले माघ १ गतेलाई नहान अर्थात् नुहाउने पर्वका रुपमा मनाउँछन् । सो दिन बिहानै तीर्थस्थलमा गई स्नान गरेर तिल दान गर्नाले सुन दान गरे सरहको पुण्य प्राप्त हुने धार्मिक विश्वास छ । माघे सङ्क्रान्तिमा दिन घ्यु, चाकु, तिलका लड्डु, खिचडी, सखरखण्ड, तरुललगायतका परिकार पनि खाने चलन छ ।

मकर सङ्क्रान्तिमा शरीरमा तिलको तेलले मालिस गर्दा दूषित पदार्थ बाहिर निस्कन्छ भन्ने विश्वास छ । शरीरका नाडी, स्नायुमण्डल र हड्डीलाई तिलको तेल मालिसबाट सुदृढ र स्वस्थ राख्न सकिने आयुर्वेद शास्त्रीय मान्यता छ । माघे सङ्क्रान्ति अर्थात् माघी पर्वको अवसरमा सरकारले सोमबार देशभर सार्वजनिक बिदा दिएको छ ।

बुद्धशान्ति –४ बर्नेको च्यालेन्जकप नकआउट फुटबल प्रतियोगिता २०८० को उपाधि  शनिश्चरे युवा क्लब अर्जुधाराले उचालेको छ ।

शनिबार सम्पन्न भएको  फाईनल खेलमा आदर्श युवा क्लब बुधबारेलाई २-० गोल अन्तरले हराउँदै शनिश्चरे युवा क्लब अर्जुधाराले  उपाधि रक्षा गरेको हो ।

उपाधिसँगै अर्जुनधाराले नगद ५५ हजार ५ सय ५५  रूपयाँ, ट्रफी र मेडल पाएको छ । उपविजेतामा सीमित आदर्शयुवा क्लबले नगद २५ हजार,५ सय ५५ रूपयाँ  ट्रफी र मेडलमा चित्त बुझायो ।

स्थानीय युनिटी युथ क्लब बर्नेको  आयोजनामा ३ बजेबाट सुरू भएको खेलमा  खेलको म्यान अफ दि म्याच  अर्जुनधाराका देवेन्द्र तामाङ भएका थिए ।

विजेता तथा उपविजेतालाई प्रमुख अतिथि नेपाली काँग्रेसका महामन्त्री तथा सांसद् विश्वप्रकाश शर्मा वडा नं ४ का वडा अध्यक्ष शेर वहादुर राय लगायतले पुरस्कार वितरण गर्नु भएको
कार्यक्रममको सन्चालन खेल  व्यवस्थापन समितिका संयोजक मोहन कुमार लिम्बूले संचालन गर्नु भएको थियो ।
पौष २१ गते बाटसुरू भएको खेल लाई थप रोचक बनाउन  बिच बिचमा नृत्य समेत प्रस्तुत गरिएको थियो ।

यसका साथै खेल अवधिभर खेलाडीलाई विधागत रुपमा समेत पु्स्कार प्रदान गरिनुका साथै प्रतेक खेलका गोल कर्तालाई १ गोल बराबर  बुधबारे बर्खा स्मृति प्रतिष्ठानका अध्यक्ष मदन प्रसाईं ले २ वटा रेडबुल प्रदान गर्दै आएको बताईएको छ ।
स्थानीय स्तरमा खेलाडी उत्पादन गर्नुका साथै खेल मैदानलाई स्तारोन्नती साथै खेलमा अनुशासनको महत्व सिकाउदै आन्तरिक पर्यटन प्रवर्धन गर्ने उदेश्यले प्रतियोगिताको आयोजना गरिएको  थियो ।

बर्खा स्मृति प्रतिष्ठान बुद्धशान्ति झापाले प्रथम झापा जिल्ला अन्तरपालिका टी–२० क्रिकेट प्रतियोगिताको आयोजना गर्ने भएको छ।

आइतबार प्रतिष्ठानको कार्यालयमा पत्रकार सम्मेलन गर्दै आगामी फागुन २ गतेदेखि १२ गतेसम्म प्रतियोगिता गर्न लागिएको प्रतिष्ठानका अध्यक्ष मदन प्रसाईंले बताउनु भयो ।

झापा जिल्लाका पन्ध्रवटै पालिकाको सहभागी हुने प्रतियोगितामा बिजेताले नगद १ लाख रुपैँया, मेडल, ट्रफी, प्रमाणपत्र पाउने छ भने उपबिजेताले नगद ५० हजार र मेडल, ट्रफी, प्रमाणपत्र पाउने बताइएको छ । खेल टी–२० को नियम अनुसार हुनेछ । अध्यक्ष प्रसाईंका अनुसार प्रत्येक टीममा १५ जना खेलाडीहरु हुनेछन् । जसमा ११ जना मुख्य खेलाडी र ४ जना बैकल्पिक रहने छन् ।  खेलमा म्यानअफ् दी म्याचलाई २ हजार, फाइनलको दिन म्यानअफ् दी म्याचलाई ५ हजार र म्यान अफ् दी सिरिजलाई १० हजार पुरस्कार पाउने छन ,।

सोही अवसरमा खेल तालिका समेत चिठ्ठा मार्फत सार्वजनिक गरिएको छ । पोल (ए) र पोल (बी) गरी खेल तालिका सार्वजनिक गरिएको हो । पहिलो खेल कनकाई नगरपालिका र बाह्रदर्शी गाउँपालिका बिच हुनेछ ।
दोस्रो खेल हल्दिबारी र गौरीगञ्ज गाउँपालिका,  तेस्रो खेल बुद्धशान्ति गाउँपालिका र मेचीनगरपालिका, चौंथो खेल झापा गाउँपालिका र गौरादह नगरपालिका, पाँचौ खेल शिवसताक्षी र कमल गाउँपालिका, छैठौँ खेल भद्रपुर र दमक नगरपालिका, सातौँ खेल अर्जुनधारा र कचनकवल गाउँपालिका बिच हुने बताइएको छ । बिर्तामोड नगरपालिका भने बाईमा परेको छ । खेल बुद्धशान्ति ३ स्थित पेट्रोल पम्प छेउको खुल्ला मैदानमा हुनेछ ।
प्रतिष्ठानका अध्यक्ष मदन प्रसाईंको अध्यक्षता तथा झापा जिल्ला क्रिकेट संघका अध्यक्ष प्रविन थापाको प्रमुख आतिथ्यता, क्रिकेट संघ कोशी प्रदेशका सदस्य नारद नेपालको बिशिष्ट आतिथ्यता, झापा जिल्ला क्रिकेट संघका कोषाध्यक्ष तुलानाथ दाहालको बिशेष आतिथ्यतामा खेल तालिका सार्वजनिक गरिएको थियो । खेल तालिका सार्वजनिक कार्यक्रमको सहजिकरण गोकुल पौडेलले गर्नु भएको । कार्यक्रमको सञ्चालन प्रतिष्ठानका सचिव मदन मगरले गर्नु भएको थियो ।

आपत विपतमा परेकाहरूलाई सहयोग गर्ने साथै बालबालिकाहरूको शिक्षा, स्वास्थ्य लगायतका सामाजिक क्षेत्रमा कार्य गर्ने स्थापना भएको यस प्रतिष्ठानले ५० लाख अक्षयकोष र २० लाख कार्यालय व्यवस्थापनका लागि गरेर ७० लाख रुपैयाँको अक्षयकोष स्थापना गरेको छ ।

स्थापनाको छोटो समयमा यस संस्थाले बुद्धशान्तिमा सामाजिक कार्य गरेर आफ्नो छुट्टै छाप छोड्न सफल भएको  सस्था हो ।

झापा। कोच राजवंशी समुदाय तथा पूर्वी तराईमा बसोबास गर्ने समग्र आदिवासी समुदायले पुस २९ गतेलाई राष्ट्रिय भक्का दिवसका रूपमा मनाउने गरेका छन् ।

पछिल्लो समय कोच राजवंशी समुदायसँगै अन्य जातजातिले पनि रुचाएपछि भक्का खाने चलन व्यापक बनेको छ । राजवंशी जातिमा मात्र सीमित रहेको भक्का खाने चलन सबै जातजातिबिच लोकप्रिय बनेपछि यसलाई प्रवर्द्धनात्मक कार्यक्रमसहित पुस २९ गते भक्का दिवस मनाउन मनाइन्छ ।

राजवंशी समुदायको परम्परागत परिकार भक्का, पूर्वी नेपालको सर्वाधिक रुचाइने एउटा परिकार हो जुन विशेषतः हिउँदमा बढी खाने गरिन्छ ।

चामलको पिठोलाई पानीको बाफमा पकाएर तयार गरिने भक्कालाई चटनीसँग खाने गरिन्छ । जे भने पनि यसको मौलिक विशेषता र स्वास्थ्यकर फाइदा दुवैलाई प्रवर्द्धन गरिन जरुरी भएको ठम्याइका साथ हरेक वर्ष पुस २९ मा राष्ट्रिय भक्का दिवस मनाइन्छ ।

माघे सङ्क्रान्तिलाई लक्षित गरी पछिल्लो एक सातामा मात्रै काठमाडौंको कालीमाटीमा ७ सय ९० टन तरुल भित्रिएको छ । माघे सङ्क्रान्तिमा तरुल खाने चलन छ ।
कालीमाटी तरकारी तथा फलफूल व्यापार विकास समितिका अनुसार पछिल्लो एक महिनामै १२ सय ११ टन तरुल काठमाडौंमा आयात भएको हो । जबकि यो वर्षको हालसम्म १४ सय ८९ टन भित्रिएको तथ्यांक छ ।

गत वर्ष १६ सय ९३ टन आयात भएको थियो । पछिल्ला केही दिनयता कालीमाटीमा अन्य तरकारीको तुलनामा तरुलको व्यापार बढेको छ ।

पछिल्ला केही दिनयता दैनिक १० क्विन्टलसम्म तरुल बिक्री हुने गरेको छ । साताअघि भने दैनिक २ क्विन्टलसम्म बिक्री हुने गरेको थियो । साताअघिसम्म प्रतिकिलो ५० रुपैयाँमा बिक्री हुँदै आएको तरुल अहिले होलसेलमै प्रतिकिलो ६० रुपैयाँभन्दा माथि पुगेको छ ।

तरुलको खुद्रा मूल्य पनि सोही दरमा महँगिएको छ । जातअनुसार मूल्य फरक-फरक छ । नेपाली बजारमा घर तरुल, वन तरुल, पातले, मुढेलगायतका जातका तरुल पाइन्छन् । काठमाडौंमा सबैभन्दा धेरै तरुल सर्लाहीबाट ल्याइन्छ ।

त्यस्तै सुनसरी, धादिङ, मकवानपुर, चितवनलगायतका जिल्लाबाट पनि काठमाडौंमा तरुल ल्याइन्छ ।

झापाको कमल ४ स्थित चुलाचुलीमा आज साँझ ४ः३० बजे दुईवटा मोटर साइकल र एउटा स्कुटर एक आपसमा ठक्कर खाँदा १ जनाको मृत्यु भएको छ ।

पश्चिमबाट पूर्व तर्फ आउने क्रममा राजमार्ग पारगर्दै गरेको मे ६ प ३१५२ नम्बरको मोटरसाइकल, सोहि दिशाबाट आउँदै गरेको प्रदेश ०१ –०१६ प ८९९२ नम्बरको मोटरसाइकल र विपरीत दिशाबाट गएको प्रदेश ०१–०१६ प ७१४० नम्बरको स्कुटर एक आपसमा ठोक्किएका थिए ।

प्रदेश ०१ –०१६ प ८९९२ नम्बरको मोटरसाइकलमा पछाडी सवार कन्काई ३ का ७० वर्षीय रघुनाथ भट्टराईको दुर्घटनामा मृत्यु भएको जिल्ला ट्राफिक प्रहरी कार्यालय झापाले जनाएको छ । उनलाई उपचारकालागि अस्पताल लैजाँदै गर्दा बाटोमै मृत्यु भएको प्रहरीले जनाएको छ ।

त्यस्तै, मे ६ प ३१५२ नम्बरको मोटरसाइकलमा सवार कमल २ बस्ने अन्दाजी ५५ वर्षका वेदप्रसाद बजगांई सामान्य घाइते भएको जनाइएको छ । दुर्घटना भएका सवारी केर्खा प्रहरी चौकिको नियन्त्रणमा रहेको प्रहरीले जनाएको छ । घटनाको बिषयमा थप अनुसन्धान भइरहेको प्रहरीले जनाएको छ ।

माओवादी केन्द्रले अगामी फागुन १ गतेदेखि ३ गतेसम्म विधान अधिवेशन गर्ने निर्णय गरेको छ।

शनिबार पार्टी केन्द्रीय कार्यालय पेरिसडाँडामा बसेमा माओवादी केन्द्रको स्थायी समिति बैठकले विधान अधिवेशन गर्ने मिति तय गरेको हो।

स्थायी कमिटी सदस्य पम्फा भुसालको नेतृत्वको ७ सदस्यीय टोलीले विधानको मस्यौदा बुझाएको थियो। सो मस्यौदा तल्लो तहका कमिटीहरूमा छलफलका लागि २१ दिन समय दिने निर्णय भएको छ।

यस्तै पार्टीको सात वटै प्रदेशबाट पार्टीको अवस्थाबारे रिपोर्टिङ गरेका छन्। पार्टी एकता समायोजनका लागि समिति गठन गर्ने भने पनि त्यसको निर्णय भने भएको छैन।

झापाको बुद्वशान्तिकी एक महिला पाँचथरमा मृत भेटिएकी छन् । अ भिषेक बिककी श्रीमती इन्दिरा नेपाली पाँचथरको फिदिम नगरपालिका-४ स्थित गढीमा मृत अवस्थामा भेटिएकी हुन् ।

आहालगैरीदेखि क्याम्पसमोड जाने बाटोमा नवनिर्मित रिञ्जी शेर्पाको घर अगाडि बाटोको भित्तामा शव भेटिएको प्रहरीले जनाएको छ ।

सडक छेउको डिलदेखि झर्दा नेपालीको मृत्यु भएको हुनसक्ने प्रहरीको अनुमान छ । शव पोष्टमार्टमका लागि पाँचथर अस्पताल ल्याइएको जिल्ला प्रहरी कार्यालय पाँचथरले जनाएको छ। घटनाका विषयमा अनुसन्धान सुरु गरिएको प्रहरीको भनाइ छ ।