दीपेश कँडेलले ह्याट्रिक विकेट लिएपछि निर्णायक खेलमा यूएईमाथि ७ रनको रोमान्चक जित निकाल्दै नेपाली टिम अर्को वर्ष श्रीलंकामा हुने यू–१९ विश्वकपका लागि छनोट भएको छ ।
सन् २०१६ यता नेपालले पहिलोपल्ट उमेर समूहको क्रिकेट विश्वकप खेल्न लागेको हो । १९२ रनको लक्ष्य पछ्याएको युएई ४८ ओभरमा सबै विकेट गुमाएर १८४ रनमात्र बनाउन सक्यो ।
यूएईको अजमानमा टस हारेर ब्याटिङ गरेको नेपालले देव खनालको अर्धशतक सहयोगमा १९१ रनको योगफल बनाएको थियो । नेपाल ४८.५ ओभरमा अलआउट भएको हो ।
आज फागुन १८ गते नेपाली क्रिकेटका लागि विशेष दिन बन्ने सम्भावना रहेको छ । यतिबेला नेपालको राष्ट्रिय क्रिकेट टीम तथा यू–१९ को टीम दुई भिन्न सीरीजका लागि यूएईमा छन् । संयोग कस्तो परेको छ भने नेपालका दुबै टीमले आज यूएईकै दुई टीमसंग प्रतिस्पर्धा गर्दैछन् ।
आज नेपालको राष्ट्रिय टोलीले दुबई अन्तर्राष्ट्रिय रंगशालामा यूएईको राष्ट्रिय टीमसंग खेल्ने छ भने यू–१९ को टोलीले अजमानमा यूएईको यू–१९ संग खेल्दैछ ।
आईसीसी यू–१९ एसिया विश्वकप छनोट अन्तर्गत नेपालको यू–१९ टीमले आजको खेलमा यूएईलाई पराजित गरेको खण्डा आगामी वर्ष श्रीलंकामा हुने आईसीसी यू–१९ विश्वकपका लागि स्वतः छनोट हुने छ । त्यसकारण पनि आजको यो खेल नेपालका लागि निकै महत्वपूर्ण मानिएको छ ।
नेपाली टीमका कप्तान देव खनालले आजको खेलमा आफ्ना टीमले विश्वकपमा स्थान बनाउने गरी मेहनत गर्ने प्रतिक्रिया दिएका छन् ।
अर्कोतिर, आज नेपालको राष्ट्रिय टीमले दुबईमा यूएईसँग प्रतिस्पर्धा गर्दै लगातार जीत निकाल्ने तयारी गरेको छ । विश्वकप लिग २ मा लगातार पाँच वटा खेल जितेपछि नेपालको एकदिवसीय अन्तर्राष्ट्रिय मान्यता जोगाउने सम्भावना बढेको छ ।
नेपालको २९ खेलमा २८ अंकसाथ छैटौं तथा यूएईको २९ खेलमा २९ अंकसहित पाँचौं स्थानमा छन् । लिग २ मा प्रतिस्पर्धी ७ टोलीमध्ये शीर्ष ३ टोली जुलाईमा हुने विश्वकप छनोटमा पुग्ने छन् भने शीर्ष ५ टोलीले एकदिवसीय अन्तर्राष्ट्रिय मान्यता कायम राख्ने छन् ।
नेपालले अब खेल्न बाँकी रहेको सात वटा खेलमध्ये ४ वटा खेल जितेमा एकदिवसीय अन्तर्राष्ट्रिय मान्यता सुरक्षित रहने छ भने छ खेल जितेमा उत्कृष्ट तीन राष्ट्र बन्दै विश्वकप छनोटमा पुग्न सक्ने छ ।
आजको खेलमा नेपालका स्टार बलर सन्दीप लामिछानेले बलिङको मोर्चा सम्हाल्ने निश्चित भएपछि नेपाली टीमको हौसला थप बढेको छ ।
झापा, फागुन १८ । प्रमुख प्रशासकीय अधिकृत टिक्नै नसक्ने नगरपालिकाका रुपमा देशभर मै बदनाम भएको झापाको मेचीनगर नगरपालिकामा नयाँ प्रमुख प्रशासकीय अधिकृतका रुपमा महेन्द्र विश्वकर्मा आउने हुनु भएको छ । सामान्य प्रशासन मन्त्रालयको अतिरिक्त समुहमा रहनु भएका उपसचिव विश्वकर्मालाई मेचीनगर नगरपालिकाको प्रमुख प्रशासकीय अधिकृतका रुपमा पठाउने निर्णय गरेको हो ।
पटक पटकका प्रमुख प्रशासकीय अधिकृतहरुसंग विवाद गरेर काम नै गर्न नदिने स्थानीय कर्मचारी र जनप्रतिनिधिहरुले पछिल्लो पटक राजकपुर चौलागाईलाई पनि काम गर्न नदिए पछि वहाँले सरुवा लिएर जानु भएको थियो । मेचीनगरमा प्रमुख प्रशासकीय अधिकृत आउनु र जानु सामान्य विषय भइसकेको छ त्यसैले नयाँ आउने विश्वकर्मा पनि कति समय टिक्लान भन्ने अडकल बाजी सुरु भएको छ ।
कार्यालयमा हाजिर नहुँदै कति दिन बस्न सक्लान भन्ने आँकलन शुरु हुनुले नगरको प्रशासनिक काम चुस्त दुरुस्त नहुने स्थानीयहरु बताउँछन । नगरपालिकाका जनप्रतिनिधिले यस अघिका प्रमुख प्रशासकीय अधिकृत चौलागाईलाई हाजिर हुन रोक लगाएका थिए । प्रमुख प्रशासकीय अधिकृत चम्लागाई विदामा गएर कार्यालय आउँदा नगरउपप्रमुख मिना उप्रेती सहित वडा अध्यक्ष, कार्यपालिका सदस्य र वडा सदस्यहरुले हाजिरमा रोक लगाएका थिए ।
यस अघि कार्यापालिकालाई असहयोग गरेको भन्दै कार्यपालिकाको बैठकले प्रमुख प्रशासकीय अधिकृत चम्लागाईबाट नगरको बजेट खर्च गर्ने अधिकार स्थगन गर्नेसम्मको निणर्य गरेको थियो ।
संघीय मामिला तथा सामान्य प्रशासन मन्त्रालयले विभिन्न निकायमा कार्यरत उपसचिव तथा प्रमुख प्रशासकीय अधिकृतहरूको सरुवा गरेको हो । नयाँ पदस्थापन गरेका अधिकांश उपसचिवहरूलाई स्थानीयमा खटाएको छ । कतिपय स्थानमा भने अवधि नै नपुगेका तथा कुनै विवाद नभई कामकाज गरी रहेका प्रमुख प्रशासकीय अधिकृतहरूलाई समेत सरुवा गरिएको छ ।
धरान, सुनसरी । एभिनियर फुटबल क्लब क्यामरुन बुढासुब्बा गोल्डकपको सेमिफाइनल प्रवेश गरेको छ । आइतबार सम्पन्न दोस्रो क्वाटरफाइनल खेलमा वाग्मती युवा क्लब सर्लाहीलाई १-० गोलअन्तरले पराजित गर्दै एभिनियरले अन्तिम चारमा स्थान सुरक्षित गरेको हो ।
एभिनियरको जितमा खेलको १४औं मिनेटमा कप्तान घिनीको पासमा सबा अलीले गरेको गोल नै निर्णायक बन्यो । मध्यान्तरअघिसम्म दबाबमा खेलेको वाग्मतीले दोस्रो हाफमा पाएको केही अवसरको सदुपयोग गर्न नसक्दा क्वाटरफाइनल खेलबाटै बाहिरिनुपर्यो ।
दोस्रो हाफको अधिकांश समय एभिनियरलाई दबाबमा राख्न सके पनि फिनिसिङ लाइन कमजोर हुँदा एभिनियर भाग्यमानी साबित भयो ।
उक्त खेलको म्यान अफ दी म्याच वाग्मतीका आयुष राणा घोषित भए । सोमबारको तेस्रो क्वाटरफाइनल खेल नेपाल पुलिस क्लब र काँकडभिट्टा फुटबल ट्रेनिङ सेन्टर झापाबीच हुनेछ । फागुन २० गतेसम्म चल्ने गोल्डकपको विजेताले नगद १० लाख र उपविजेताले ५ लाख पाउनेछ ।
सुनसरी र पाँचथरबाट चोरीका मोटरसाईकल,सामान सहित १७ जना पक्राउ परेका छन । पाँचथर प्रहरीले मोटरसाइकल चोरी गर्ने समूहका आठ जनालाई चोरीका मोटरसाइकल र तिनका पार्टपुर्जा सहित पक्राउ गरेको छ ।
जिल्लाका विभिन्न स्थानबाट नियमित मोटराइकल हराएका उजुरी पर्न थालेपछि प्रहरीले छिमेकी तेह्रथुमको आठराई गाउँपालिकाबाट उनीहरूलाई पक्राउ गरेको हो।पक्राउ पर्नेहरुमा फिदिम १ मा मोटरसाइकल ग्यारेज सञ्चालन गर्दै आएका २८ वर्षीय वीरेन्द्र राना, इलाम फाकफोकथुम २ घर भई तेह्रथुमको आठराईमा दुग्ध डेरी सञ्चालन गर्दै आएका तारा बस्नेत, आठराई गाँउपालिका ४ तेह्रथुम बस्ने एकमान दियाली, पबिन इङनाम, वासुदेव तामाङ, सुरज पुर्वछाने मगर, शिवकुमार तामाङ र श्रीप्रसाद तामाङ छन् ।
उनीहरुको साथबाट चोरीका ७ थान मोटरसाइकल र तिनका पार्टपुर्जा बरामद गरेको जिल्ला प्रहरी कार्यालय पाँचथरका प्रमूख डीएसपी हरि खतिवडाले जानकारी दिए । उनका अनुसार पक्राउ परेका सबै युवक १९ देखि २८ वर्ष उमेर समूहका छन् ।
उनीहरुलाई प्रहरीले शनिबार पक्राउ गरी सार्वजनिक गरेको हो । उनीहरुले पाँचथर र तेह्रथुमका विभिन्न स्थानबाट मोटरसाइकल चोरी गरी इन्जिन, पार्टपुर्जा र नम्बरसमेत परिवर्तन गरी बिक्री गर्ने गरेको पाइएको प्रहरीले जनाएको छ । उनीहरुले चोरी गरेकामध्ये केही मोटरसाइकलको स्वरुप नै परिवर्तन गरेर बिक्री गरेको पाइएको छ । पक्राउ परेकामध्ये केही मोटरसाइकल सम्बन्धित व्यक्तिलाई बुझाइएको छ । केही भने अनुसन्धानको प्रकृयामा छन् ।
उनीहरुलाई जिल्ला प्रहरी कार्यालय पाँचथरको हिरासतमा राखी अनुसन्धान सुरु गरिएको पनि खतिवडाले जानकारी दिए ।
यता सुनसरीको बराहक्षेत्र नगरपालिका ३ स्थितबाट मोटरसाईकल चोरीमा सम्लग्न तीन जनालाई चोरी गरेको मोटरसाईकल सहित प्रहरीले पक्राउ गरेको छ । पक्राउ पर्नेमा बराहक्षेत्र १ का ३४ बर्षीय सजन श्रेष्ठ, धरान ४ का २८ बर्षीय विश्वराज राई र धरान १३ का २३ बर्षीय रतिस श्रेष्ठ रहेका छन ।
अस्थायी प्रहरी चौकी नहडाबाट खटिएको प्रहरी टोलीले चेकजाँचको क्रममा गत माघ ६ धरान ११ का सुरज तामाङको घरमा पार्किङ गरी राखेको अवस्थामा चोरी भएको प्रदेश १-०२-०४०प २८१८ नम्बरको मोटरसाईकलको नम्वर प्लेटलाई को ३८ प ८०६५ लेखि चलाई रहेको अवस्थामा उनिहरुलाई पक्राउ गरेको हो। पक्राउ परेका तीनै जनाको इलाका प्रहरी कार्यालय धरानबाट थप अनुसन्धान भईरहेको छ। यसैबिच धरानमा प्रहरीले गाडीहरुमा प्रयोग हुने ब्याट्री चोरी गर्ने गिरोह र खरिद गर्ने कबाड सञ्चालकसहित ६ जनालाई पक्राउ गरेको छ।
धरानस्थित इलाका प्रहरी कार्यालयका प्रहरी निरीक्षक देउकुमार लिम्बूका अनुसार उनीहरुलाई आइतबार नै सुनसरी जिल्ला अदालतमा म्याद थप गर्न लगिएको छ। म्याद थप गरेर ल्याइसकेपछि मात्र उनीहरुको नाम सार्वजनिक गर्ने प्रहरीले जनाएको छ।
धरान–५ देउरालीमा गाडीको ब्याट्री चोरी भएको जानकारी अस्थायी प्रहरीचौकीमा दिएपछि चोर पक्राउ परेलगत्तै थप अनुसन्धान गर्दा ठूलै गिरोह रहेको रहस्य खुलेको प्रहरीले जनाएको छ । सीसीटीभी फुजेटबाट चोरी गर्दै गरेको देखिएपछि चोर पत्ता लागेको थियो।
चोरहरुले ट्याक्टर, टिपर, बस, ट्रक, टेम्पो, सफारीलगायतका सवारीसाधनहरुको ब्याट्री चोर्ने गरेको ती ब्याट्री सस्तोमा कबाडवालालाई बेच्ने गरेको रहस्य खुलेको प्रहरीले जनाएको छ।उनीहरुले चोरी गरेको ठूलो परिमाणको ब्याट्री पनि प्रहरीले बरामद गरेको छ । गाडीका ब्याट्री चोर पक्राउ परेको जानकारी पाएपछि थुप्रै पीडितहरु प्रहरीमा पुगेका थिए।
नेपाल क्रिकेट संघ (क्यान) को वार्षिक साधारणसभा आजदेखि कर्णाली प्रदेशको राजधानी सुर्खेतमा सुरु हुँदैछ ।
क्यानले पहिलो पटक कर्णाली प्रदेशमा साधारण सभा गर्न लागेको हो । आज वीरेन्द्रनगरस्थि शुभ होटलमा बिहान १० बजे सुरु हुने कार्यक्रम आइतबार र सोमबार दुई दिनसम्म चल्ने छ । साधारण सभामा वार्षिक कार्यक्रमका साथै बजेटदेखि विवादित नेपाल टी-२० लिगको विषयमा छलफल हुनेछ ।
गत पुसमा काठमाडौंमा भएको पहिलो संस्करणको नेपाल टी-२० लिगमा विभिन्न विवादेखि स्पट फिक्सिङसम्म भएपछि क्यानको चर्को आलोचना भएको थियो ।
पहिलो संस्करणमै निकै विवाद बनेपछि नेपाल टी-२० लिग अब कसरी अगाडि बढाउने भन्ने विषयमा साधारण सभामै छलफल गर्ने निर्णय गर्ने क्यानले यसअघि नै घोषणा गरिसकेको छ ।
यस्तै व्यावसायिक तथा रणनीतिक साझेदारको रुपमा रहेको भारतीय कम्पनी सेभेन थ्री स्पोर्ट्ससँगको सम्झौताको विषयमा पनि छलफल हुनेछ ।
लिग विवादित बनेपछि सेभेन थ्री स्पोर्ट्सले यसअघि नै एकपक्षिय रुपमा सम्झौता रद्द गरिएको जानकारी क्यानसहित राष्ट्रिय खेलकुद परिषद्लाई पठाएको थियो । तर क्यानले अझै सेभेन थ्रीबाट लाइसेन्स फि को रकम देखि पुरस्कार रकम पाउन बाँकी नै रहेकोले यस विषयमा साधारण सभाबाटै निर्णय गर्ने जनाएको छ ।
यस बाहेक साधारण सभा संघको २०२३ को वार्षिक कार्यक्रम, कार्ययोजना र बजेट अनुमोदनको विषयमा पनि छलफल हुनेछ । आर्थिक नियमावली संशोधनको विषयमा पनि छलफल हुनेछ ।
झापाको बुद्धशान्ति गाउँपालिका वडा नं ३ मा रहेको दुईरिङ्गे कृषि सहकारी संस्था को १४औँ वार्षिक साधारण सभा सम्पन्न भएको छ। आफ्नै भवन निमार्ण स्थलमा भएको कार्यक्रम, संस्थाका अध्यक्ष मेहेन्द्र तिम्सिनाको अध्यक्षतामा भएको थियो। त्यस्तै युवा तथा साना व्यवसायी स्वरोजगार कोष झापा जिल्ला समन्वय समितिका सचिव सन्तोष सापकोटाको प्रमुख आतिथ्यता रहेको कार्यक्रममा विशिष्ट अतिथिका रुपमा बुद्धशान्ति गाउँपालिका वडा नं. ३ का वडाध्यक्ष पर्शुराम चेम्जोङ र अर्जुनधारा नगरपालिका वडा नं. १० का वडाध्यक्ष भुपेन्द्र न्यौपानेको आतिथ्यता रहेको थियो।
कार्यक्रममा विशेष अतिथिका रुपमा आदर्श सामुदायिक वन उपभोक्ता समितिका उपाध्यक्ष खगेन्द्र आचार्य र ओमकारेश्वर शिवलय मन्दिरका अध्यक्ष छत्र बहादुर विष्ट रहेका थिए।
संस्थाका पूर्व व्यवस्थापक सुमन रेग्मीले शाब्दिक स्वागत गरेको कार्यक्रमको संचालन सल्लाहकार समिति संयोजक बद्री भण्डारीले गरेका थिए।
संस्थाले वार्षिक साधारण सभाकै अवसरमा उत्कृष्ट बचतकर्ताको रुपमा मायादेवी गौतम, हिमादेवी बानिया, सोमनाथ लुईटेल र मोहनमाया राईलाई सम्मान गरेका थियो। त्यस्तै उत्कृष्ट व्यवसायीका रुपमा टिकाराम रिजाल र हेमकुमारी नेपाललाई पनि सम्मान गरेको थियो। यता उत्कृष्ट कर्मचारीका रुपमा ममता अधिकारी पनि कार्यक्रममा सम्मानित भएकी थिइन्।
संस्थाले यस आर्थिक वर्षमा १४ लाख ६७ हजार भन्दा बढी नाफा गरेको प्रतिवेदनमा उल्लेख छ।
संस्थाले वार्षिक उत्सवकै अवसरमा आँखा शिविर समेत संचालन गरेका थियो। शिविरमा २०० बढिले सेवा लिएका छन।
इटहरीमा वृहत्त रक्तदान कार्यक्रम सम्पन्न भएको छ । श्री जनता मा. वि. इटहरी र इटहरी जेसीज को संयुक्त आयोजनामा भएको रक्तदान कार्यक्रम आज इटहरी ९ स्थित श्री जनता मा. वि. को प्राङ्गणमा सम्पन्न भएको छ ।
आज सम्पन्न सो कार्यक्रममा ८५ पिन्ट रगत संकलन भएको इटहरी जेसिजका अध्यक्ष योगेन्द्र पौडेलले जानकारी दिनु भएको छ ।
उक्त कार्यक्रममा सह-आयोजकका रूपमा श्री जनता माध्यमिक बिद्यालय पूर्व विधार्थी समाज, नेपाल रेडक्रस सोसाइटी इटहरी उप-शाखा,रोटरी क्लब अफ इटहरी युगल तथा अन्य संघ संस्था, युवा क्लबहरुको सहयोग समेत रहेकोे जनकारी रक्तदान कार्यक्रमका संयोजक होमराज थपलियाले दिनु भएको छ ।
रगत अभाबको समस्यालाई मध्यनजर गर्दै आयोजना गरिएको उक्त कार्यक्रममा उद्योग वाणिज्य संघ ईटहरीका अध्यक्ष, ईटहरी जेसीजका अध्यक्ष, नेपाल जेसीजका पूर्व अध्यक्ष, विभिन्न संघ संस्थाका व्यत्तित्व, विद्यालयका शिक्षक विद्यार्थी तथा स्थानीयहरुको संलङ्गता रहेको जानकरीे विद्यालयका सूचना अधिकारी ज्योति कोइरालाबाट प्राप्त भएको छ ।
रगत संकलनका लागि नेपाल रेडक्रस सोसाइटीको समन्वयमा वि. पि. कोइराला स्वस्थ्य बिज्ञान प्रतिस्ठानको टोलिले सहयोग गरेको थियो ।
झापाको बुद्धशान्ति २ स्थित आदर्श माध्यमिक विद्यालयको ६३ अौं वार्षिकोत्सव सम्पन्न भएको छ । विद्यालय व्यवस्थापन समितिका अध्यक्ष लक्ष्मी प्रसाद सुवेदीको अध्यक्षतामा भएको वार्षिकउत्सव कार्यक्रमको प्रमुख अतिथिका रुपमा बुद्धशान्ति गाउँपालिकाका अध्यक्ष मनोज प्रसाईकाे आतिथ्यता रहेको थियो ।
त्यस्तै विद्यालयका जग्गादाता, स्थानीय समाजसेवी, शिक्षासेवी, अभिभावक, विभिन्न संघसंस्थाका प्रतिनिधी लगायतको आतिथ्यतामा भएको कार्यक्रममा उपस्थित सम्पूर्णलाई विद्यालयका पूर्व प्रधानाध्यापक तथा वर्तमान शिक्षक नरेन्द्र प्रसाद भट्टराईले शाब्दिक स्वागत गरेका थिए ।
कार्यक्रममा तारादेवी भण्डारीको संयोजनमा विद्यार्थीहरुले गीता वाचन पनि गरेका थिए। उपस्थित सम्पूर्णलाई स्वागत गर्न कक्षा ६ र ७ का विद्यार्थीहरुले प्रस्तुत गरेको स्वागत नृत्यले कार्यक्रमलाई थप रोचक बनाएको थियो।
विद्यालयको ६३ अाैं वार्षिक उत्सवको अवसरमा विद्यालयका प्रधानाध्यापक करुण कुमार पराजुलीले आर्थिक तथा प्रगति प्रतिवेदन प्रस्तुत गरेका थिए ।
कार्यक्रममा विभिन्न अक्षयकोषदाताहरुलाई सम्मान पनि गरिएको थियो सम्मानित हुनेहरुमा अक्षयकोषदाता शशिधर भण्डारी, तारानाथ/ चन्द्रकला विमली त्यस्तै विष्णुमाया भट्टराई रहेका छन् भने विद्यालयको कोठा निमार्ता यशोदा ओलीलाई पनि कार्यक्रममा सम्मान गरिएको थियो ।
विद्यालयको वार्षिक उत्सवकै अवसरमा देवीप्रसाद फूलमाया अक्षयकोषद्वारा ठाकुर नारायण श्रेष्ठ र तारादेवी सापकोटालाई सम्मान गरिएको थियो भने कर्णबहादुर लक्ष्मी थकुँ अक्षयकोषद्वारा विद्यालयका प्रधानाध्यापक करुण कुमार पराजुली समेत सम्मानित भएका थिए ।
कार्यक्रममा सांस्कृतिक विभाग प्रमुख तुलसी ओलीको संयोजकत्वमा साकेला, थारु, मगर, लिम्बू नाच र गायन प्रस्तुतीले कार्यक्रमलाई थप रोचक बनाएको थियो ।
कार्यक्रममा बोल्दै बुद्धशान्ति गाउँपालिका अध्यक्ष मनोज प्रसाईले बुद्धशान्ति गाउँपालिकाले शिक्षामा पालिकाबाट गर्नुपर्ने कुनैपनि सहयोगमा आफु लाग्ने बताएका छन।
विभिन्न लोक संस्कृति झल्काउने प्रस्तुतीहरु समेत देखाइएको कार्यक्रमको संचालन शिक्षक सिपि पौडेलले गरेका थिए ।
इटहरीमा वृहत्त रक्तदान कार्यक्रम सम्पन्न हुने भएको छ। श्री जनता मा. वि. इटहरी र इटहरी जेसीज को संयुक्त आयोजनामा हुन लागेको उक्त कार्यक्रम यहि मिति २०७९ फाल्गुन १२ गते शुक्रबार का दिन बिहान ८ बजे देखि इटहरी ९ स्थित श्री जनता मा. वि. को प्राङ्गणमा सम्पन्न हुने भएकाे छ।
उक्त कार्यक्रममा सह-आयोजकका रूपमा श्री जनता माध्यमिक बिद्यालय पुर्व विधार्थी समाज, नेपाल रेडक्रस सोसाइटी इटहरी उप-शाखा,राेटरी क्लब अफ इटहरी युगल तथा अन्य संघ संस्था, युवा क्लबहरुको सहयोग समेत रहने जनकारी श्री जनता मा वि इटहरीका प्राधानाध्यापक पशुपति सिग्देलले दिनु भएको छ।
पुर्वमा रगतको आभब महसुस हुन थलेपछि अधिकतम रगत संकलन गर्ने उदेश्यका साथ उक्त कार्यक्रम आयोजना गर्न लगिएको हो। रगत संकलनका लागि नेपाल रेडक्रस सोसाइटीको समन्वयमा वि. पि. कोइराला स्वस्थ्य बिज्ञान प्रतिस्ठानको टोलिले सहयोग गर्ने भएकाे छ।
त्यस्तै बृहत रक्तदान सङ्गै श्री जनता मा वि ले सोही दिन अन्य कार्यक्रम- प्रथम जनता ओलम्पिक्स २०७९ को समापन , नवनिर्मित भवनको उद्घाटन तथा बिध्यालयलाई उत्कृष्ट योगदान गरेका ब्याक्तित्वहरुलाई सम्मान समरोह समेत राहेकाे विद्यालयका सूचना अधिकारी ज्योति कोइरालाबाट जानकरी पाइएको छ।
उक्त दिनकाे कार्यक्रम नेपाल सरकारको महिला, बालबालिका तथा ज्येष्ठ नगरिक मन्त्री माननीय भगवती चौधरी ज्यूको प्रमुख आतिथ्यतामा रहने जनकारी बिध्यालय ब्यबस्थापन समितिका अध्यक्ष काशिनाथ दंगालले गराउनु भएकाे छ। उहाँका अनुसार समाज प्रति बिध्यर्थीहरुलाई कसरी उत्तरदायी बनाउने भन्ने उदेश्य सहित सो कार्यक्रम आयोजना गरिन लगेको बताउनु भएको छ।
